Sáttamiðlun með þátttöku barna: „Börnin eru í miðjunni á þessu og afhverju mega þau þá ekki vera í miðjunni að finna lausn út úr því“

Börn hafa ótvíræðan rétt samkvæmt lögum til að tjá sig um mál sem þau varðar. Sáttamiðlun með þátttöku barna er aðferð innan sáttameðferðar sem hlotið hefur mikinn stuðning erlendis síðastliðna áratugi. Aðferðinni er beitt hjá Sýslumanninum á höfuðborgarsvæðinu þar sem gagnreyndar aðferðir með börnum eru notaðar henni til stuðnings. Auk þess leita sjálfstætt starfandi sáttamiðlarar eftir þátttöku barna í sáttameðferð en nota til þess mismunandi aðferðir. Notast var við blandaða aðferð við gerð rannsóknarinnar. Annars vegar voru eigindleg viðtöl tekin við fagaðila til að hljóta innsýn í upplifun þeirra á að veita sáttamiðlun með þátttöku barna. Hins vegar voru fyrirliggjandi gögn frá Sýslumanninum á höfuðborgarsvæðinu notuð til að setja fram lýsandi tölfræði á sáttameðferð og störfum sérfræðinga í málefnum barna. Megindlegar niðurstöður sýna að sátt næst í um 45% þeirra mála sem fara í sáttameðferð hjá Sýslumanninum á höfuðborgarsvæðinu. Tekin eru viðtöl við börn í tengslum við þau mál í um 18,5% tilfella. Eigindlegar niðurstöður rannsóknarinnar sýndu fram á að fagaðilar eru almennt hlynntir sáttamiðlun með þátttöku barna og telja hana vænlegri til árangurs þegar leysa á ágreining milli foreldra. Fagaðilar telja foreldra vera helstu hindrun þess að aðferðinni sé beitt og telja fagaðilar það til komið vegna ótta og skorts á fræðslu og upplýsingum. Rannsóknin sýnir fram á mikilvægi þess að gera almenningi kunnugt um sáttamiðlun með þátttöku barna til að leysa úr ágreiningi foreldra með hagsmuni og velferð barna að leiðarljósi